Kushtrim Ajvazi, ekonomist në emisionin FIVE në RTV Dukagjini, ka thënë se pas njoftimeve të KEK-ut dhe KESCO-s, si dhe pas shqetësimeve të ngritura për mungesën e rrymës, ka pasur mobilizim institucional.
Ai ka treguar se ka vizituar faqen zyrtare të KEK-ut, ku ka parë dhe ka publikuar njoftimin për planifikimin e prodhimit të datës 21 qershor, i cili, sipas tij, ishte paraparë të jetë 0 MW/h.
“Unë besoj se është bërë një ndërhyrje pas këtij njoftimi dhe pas situatës së krijuar me shqetësim, sepse personalisht hyra në faqen e KEK-ut ku është i publikuar planifikimi ditor i prodhimit për ditën e nesërme dhe e publikova. Prodhimi për datën 21 qershor ishte i planifikuar të jetë 0 MW/h,” ka deklaruar Ajvazi.
Ai shtoi se, para se të shkonte në studio, në faqen e KEK-ut ishte bërë një përditësim i të dhënave.
“Planifikimi për prodhim orar tani është rreth 110 MW/h për datën 21 qershor, ndërsa planifikimi i konsumit varion nga 700 deri në 800 MW/h. Kjo nënkupton që KEK-u do të mbulojë rreth 12% të ngarkesës totale për atë ditë,” ka thënë ai.
Ajvazi ka theksuar edhe njëherë se planifikimi fillestar i KEK-ut për 21 qershor ka qenë 0 MW/h.