Ambasada e Gjermanisë në Kosovë ka reaguar me rastin e dyvjetorit të sulmit terrorist në Banjskë, ku më 24 shtator 2023 mbeti i vrarë rreshteri i Policisë së Kosovës, Afrim Bunjaku.
Në një deklaratë të saj, ambasada ka theksuar se dy vite pas ngjarjes së rëndë, autorët e këtij sulmi, përfshirë edhe udhëheqësin e vetëpranuar të tij, Milan Radoiçiq, vazhdojnë të jenë të lirë në Serbi.
“Dy vjet nga sulmi i tmerrshëm në Banjskë dhe megjithatë, udhëheqësi i vetëpranuar i sulmit, Radoiçiq, vazhdon të jetojë i lirë në Serbi. Dy vite nga vrasja e oficerit të Policisë së Kosovës, Afrim Bunjaku, dhe pavarësisht garancive të shumta se autorët do të mbahen përgjegjës, ende nuk është sjellë drejtësi. Kjo pandëshkueshmëri e qartë është e papranueshme”, thuhet në reagimin e ambasadës gjermane.
Tutje, ambasada thekson se është imperative që llogaridhënia dhe drejtësia të zbatohen pa asnjë vonesë të mëtejshme.