Pesë policët të cilët dyshohen për “vrasje nga pakujdesia” të qytetarit Agon Zejnullahu në Lipjan, janë liruar nga paraburgimi këtë javë, pas vendimit të dytë të Gjykatës së Apelit.
Të njëjtit u pretendua se u lanë në paraburgim nga Gjykata Themelore më shumë për shkak të presionit publik, sesa nga veprimet e tyre.
Ish-zyrtari policor Hilmi Canolli, thotë se kjo është arsyeja kryesore që mbetën në paraburgim.
“Unë mendoj që presioni publik, ka ndikuar më tepër në caktimin e masës së paraburgimit, sesa në lirimin e tyre, për arsyje se, I gjithë opinion publik ka pas postime të pafundme në rrjetet sociale, nëpër portale të ndryshme, ku në njëfar forme edhe policia është sulmu në këtë rast”, ka thënë Hilmi Canolli, Ish-zyrtar policor.
Canolli beson që policët kanë vepruar siç ka qenë e nevojshme.
E eksperti i sigurisë Drizan Shala, thotë që veprime dhe raste të tilla, mund të dëmtojnë imazhin e Policisë së Kosovës, por jo edhe ndaljen e punës së tyre.
“Rastet e tilla sensitive të cilët japin impakte të caktuara mund të ndikojnë në vendimet gjyqësore por asesi në punën zyrtarëve policorë, prandaj ky vendim është një mesazh që policia mund të kryejnë punën e tyre konform legjislaturës së Kosovës”, ka thënë Drizan Shala, Ekspert i sigurisë.
Televizioni provoi të marrë një qëndrim edhe nga familja e Zejnullahut në lidhje me këtë vendim të Apelit, por ajo ishte e pa qasshme.