Kryetari i Aleancës për Ardhmërinë e Kosovës(AAK), Ramush Haradinaj, në seancën e 14 tetorit në Kuvendin e Kosovës, sa i përket dialogut Kosovë-Serbi, ka kritikuar kryeministrin Kurti për mostransparencë, duke thënë se kryeministri lidhur me procesin e dialogut, duhet të japë sqarime para deputetëve në Kuvend dhe jo të detyrohen gazetarët që ta ndjekin në traktor.
Ai ka thënë se kryeministri duhet të tregojë se çka është puna e këtyre dokumenteve për kornizë të “re” të dialogut, si “franko-gjermane”.
Haradinaj ka thënë se për të nuk ekziston ndonjë dokument franko-gjerman, por vetëm dokument amerikano-evropian, sepse siç thotë ai, të gjitha dokumentet që vijnë nga ndërkombëtarët janë “një dokument”.
“Unë e di që është vetëm një, i Lajçakut dhe i të ngarkuarve, jo i vendimmarrësve”, ka vijuar ai.
Ai ka theksuar se në dialogun me Serbinë, duhet të ketë një marrëveshje të obligueshme ligjore dhe gjithëpërfshirëse, e cila duhet të rezultojë me njohje reciproke, pasi sipas tij, çdo formë tjetër do ta shkatërronte Kosovën.