Kryetari i Aleancës për Ardhmërinë e Kosovës, Ramush Haradinaj, këtë të enjte është takuar me kryeministrin e Shqipërisë, Edi Rama, në Tiranë.
Gjatë takimit, Haradinaj thotë se është diskutuar për zhvillimet që po kalon Kosova, Shqipëria dhe rajoni.
Haradinaj përmes një postimi në Facebook potencon kërkesën që ia adresoi kryeministrit Rama, e që është të ndihmojë në tejkalimin e sfidave që aktualisht i ka Kosova dhe të përshpejtojë integrimin e saj.
“Sot në Tiranë një takim vëllazëror me Kryeministrin e Shqipërisë, Edi Rama. Diskutuam për zhvillimet që po kalon Kosova, Shqipëria dhe rajoni dhe për proceset që na presin, veçanërisht për sfidat e Kosovës në çështjet që kanë të bëjnë me dialogun, sigurinë dhe perspektivën e integrimeve euro-atlantike. I kërkova kryeministrit shqiptar që në të gjitha nivelet e bisedave me faktorin ndërkombëtar e kombëtar të ndihmojë në tejkalimin e sfidave që i ka Kosova dhe të përshpejtojë integrimin e saj”, shkroi Haradinaj.
Ai e falëndëroi Ramën për kujdesin në këtë fazë të “vështirë” që po kalon Kosova.
“E falënderova përzemërsisht për kujdesin e tij dhe të Shqipërisë në këtë periudhë jo të lehtë që po kalon Kosova”.