Kryetari i Aleancës për Ardhmërinë e Kosovës (AAK), Ramush Haradinaj, ka theksuar rëndësinë e bashkëpunimit të ngushtë me aleatët ndërkombëtarë, veçanërisht me NATO-n dhe Shtetet e Bashkuara të Amerikës (SHBA), duke e konsideruar këtë aleancë si një faktor kyç për sigurinë dhe të ardhmen e Kosovës.
“Aleanca me NATO-n, në krye me ShBA-në, është qenësore për Kosovën. Vendimet e marra në koordinim me aleatët tanë janë pashmangshëm në favor të shtetit tonë sovran dhe të ardhmes së tij”.
“Hisedarët e shtetësisë së Kosovës nuk mund të anashkalohen, i jemi përjetësisht falënderues NATO-s dhe trupave të tyre të KFOR-it për angazhimin e vazhdueshëm në ngritjen e cilësisë dhe kapaciteteve tona ushtarake të FSK-së”, ka shkruar Haradinaj në Facebook.
Ai ka shprehur gjithashtu ngushëllime për familjen e qytetarit që humbi jetën në Liqenin e Ujmanit.
“Shpreh ngushëllimet e mia më të sinqerta familjes së qytetarit që humbi jetën në Liqenin e Ujmanit. Në këtë moment dhimbjeje, jemi pranë familjarëve dhe të afërmve të tij”, ka theksuar Haradinaj.