Ushtria izraelite ka intensifikuar sulmet ajrore në Rripin e Gazës gjatë natës së të dielës dhe mëngjesit të së hënës, duke shkaktuar të paktën 55 viktima, njoftojnë zyrtarët lokalë shëndetësorë.
Mes të vrarëve është edhe një gazetar i njohur, për të cilin autoritetet izraelite pretendojnë se ishte militant i Hamasit. Në mesin e viktimave janë edhe civilë që po prisnin ndihma humanitare.
Sipas raportimeve, të paktën 34 persona u vranë vetëm gjatë ditës së hënë, ndërsa gjashtë gazetarë humbën jetën në një sulm ndaj një tenda pak para mesnatës, raporton The Guardian.
Fares Awad, drejtues i shërbimeve të ambulancës në zonën veriore të Gazës, tha se mbi 15 persona u vranë teksa po prisnin ndihmat në pikën kufitare Zikim.
Forcat Mbrojtëse të Izraelit (IDF), nuk kanë dhënë koment zyrtar lidhur me këto incidente të fundit.
Më herët, IDF-ja konfirmoi se njësitë ajrore dhe artileria po operonin në veri të Gazës dhe në Khan Younis. Banorja lokale Noha Abu Shamala i tha agjencisë Associated Press se dy sulme me dronë kanë vrarë një familje prej shtatë personash në shtëpinë e tyre.
Në Ministrinë e Shëndetësisë në Gaza raportojnë edhe pesë vdekje të shkaktuara nga uria dhe kequshqyerja në 24 orët e fundit, përfshirë dy fëmijë. Që nga 7 tetori i vitit 2023, numri i përgjithshëm i vdekjeve të lidhura me urinë në Rripin e Gazës ka arritur në 227, prej të cilëve 103 janë fëmijë.
Zyrtarët e Kombeve të Bashkuara kanë paralajmëruar se popullsia e Gazës po përballet me një krizë humanitare ekstreme dhe “uri – thjesht dhe qartë”, ndërsa Izraeli po përgatitet për zgjerimin e ofensivës në territor.