Policia e Kosovës ka ndaluar një veturë të mërkurën në fshatin Zhernovsë të Leposaviqit, në të cilën janë gjetur 22 pako me mish derri, secila me peshë rreth 10 kilogramë, që dyshohet se janë kontrabanduar nga Serbia për në Kosovë.
Sipas njoftimit të Policisë, i dyshuari B.M. (i lindur në vitin 1991) kishte hyrë në territorin e Kosovës përmes rrugëve ilegale nga Serbia.
“Parandalimi i rasteve të kontrabandimit me mallra është një ndër objektivat e Policisë Kufitare, sepse përveç trajtimit penal të rastit, është i rëndësishëm edhe në ruajtjen e shëndetit publik. Lidhur me rastin është kontaktuar prokurori kujdestar i cili ka urdhëruar të hapet rasti ‘Kalimi i paautorizuar i vendkalimit kufitar apo vijës kufitare’, kurse malli dërgohet në terminalin doganor për procedura të mëtejme nga njësitë doganore”, thuhet në komunikatën e Policisë.
Kujtojmë se më 30 korrik, Agjencia e Ushqimit dhe Veterinarisë (AUV) ndaloi importin e kafshëve të gjalla dhe produkteve të derrit nga Serbia, pas konfirmimit të dy sëmundjeve ngjitëse në këtë vend: “Gjuhës së kaltër” dhe “Murtajës afrikane të derrit”.