Sot në pikën kufitare në Vërmicë janë kapur sasi të djathërave të padeklaruara dhe të fshehura në autobusin e linjës Tiranë – Prishtinë.
Kështu ka njoftuar Dogana e Kosovës.
Siç njofton Dogana, kontrolli ka nisur pasi vozitësi i autobusit është shprehur se nuk ka asgjë për të deklaruar.
“Mbrëmë në pikën kufitare të Vermicë, njësitet antikontrabandë të Doganës së Kosovës kanë selektuar për kontroll të detajuar një autobus që qarkullon në linjën Tiranë – Prishtinë. Gjatë kontrollit, vozitësi është pyetur nëse kishte ndonjë gjë për të deklaruar, dhe pasi ai është deklaruar se nuk kishte asgjë, është filluar kontrollit të detajuar”, thuhet në njoftim.
Gjatë kontrollit janë gjetur rreth 150 kilogramë djathë të llojeve të ndryshme që thuhet se është me origjinë nga Italia.
“Gjatë këtij kontrolli është gjetur e fshehur dhe e padeklaruar një sasi e konsiderueshme e djathërave të ndryshme me origjinë nga Italia. Malli i padeklaruar është ndaluar, në total rreth 150 kg. Përveç tetimit të shmagies së taksave, këto produkte nuk kanë plotësuar kushtet higjienike të transportit dhe si të tilla mund të rrezikojnë shëndetin e qytetarëve të Kosovës”, thuhet tutje në njoftim.