Katari e ka nisur Kampionatin Botëror me humbje.
Ani pse ishin vendës, në fushën e gjelbër u mposhtën nga Ekuadori me rezultat të pastër 0-2.
Mysafirët filluan sulmet nga fillimi dhe arritën të shënojnë qysh në minutën e tretë me anë të Enner Valencia, por goli u anualua pas rishikimit me VAR.
Se Valencia ishte në formë të lartë e tregoi në minutën e 16-të kur shënoi për 0-1 nga pika e bardhë.
I njëjti futbollist realizoi përsëri në minutën e 31-të dhe festa shpërtheu në taborin e mysafirëve.
Në anën tjetër, përkundër përpjekjeve, Katari nuk arriti ta shënojë as golin e nderit.
Kjo ishte ndeshja e parë në kuadër të këtij botërori, teksa nesër do të ketë tri të tilla.
Nesër me fillim nga ora 14:00, Anglia përballet me Iranin, pastaj në ora 17:00 Senegali takohet me Holandën, ndërsa USA dhe Uellsi luajnë në ora 20:00.