Bordi i Asociacionit të Komunave të Kosovës ka kërkuar që me Projektligjin për Tatimin në pronë, krahas faljes së 100 eurove të vendoset që rimbursimin e kësaj shume ta mbulojë niveli qendror, në mënyrë që të mos varfërohen komunat e Kosovës dhe të mos ketë ndikimin në realizimin e projekteve kapitale të parapara me buxhetet komunale të këtij viti.
Në Komisionin Parlamentar për Buxhet dhe Financa të Kuvendit të Kosovës ka kaluar Projektligji për plotësim ndryshimin e Tatimit në Pronë, me anë të të cilit është propozuar edhe falja e 100 eurove të para nga tatimi në pronë i qytetarëve të Republikës së Kosovës.
“As si Komuna e as si Asociacion i Komunave të Kosovës nuk jemi konsultuar për këtë propozim dhe as për ndikimet që do t’i ketë ky Ligj në buxhetet komunale dhe realizimin e projekteve të tyre kapitale. Edhe me këtë rast, nuk janë marrë fare parasysh specifikat e Komunave e ku kjo do të afektojë sidomos komunat e vogla kur të hyrë kryesore kanë të hyrat vetanake nga tatimi në pronë”, ka thënë kryetari i Asociacioni të Komunave të Kosovës, Sazan Ibrahimi.
Me këtë projektligj, sipas AKK-së, niveli qendror do t’i detyrojë komunat të marrin vendime për faljen e 100 eurove të para, e sidomos tashmë pasi janë shpërndarë faturat e tatimit në pronë dhe në anën tjetër janë aprovuar buxhetet komunale me projeksionin e të hyrave pa falje dhe mbi bazën e këtij projeksioni buxhetor është paraparë edhe realizimi i projekteve kapitale.
“Nga analizat tona mund të konkludohet se nga një veprim i tillë komunat mund t’i kenë për 40% më të ulëta të hyrat vetanake për vitin 2023 sesa është paraparë nga projeksionet buxhetore”.
AKK është shprehur e gatshme për debat dhe për paraqitjen e propozimit të tyre si pushtet lokal që do të zbatojë këtë akt ligjor dhe do të ndikohet nga efektet e tij.
“Të nderuar anëtarë të Kryesisë së Kuvendit. Shpresojmë që kjo do të jetë hera e fundit që komunat nuk konsultohen për ligje të cilat kanë një impakt të drejtpërdrejtë në funksionimin e pushtetit lokal në Republikën e Kosovës”.