Qeveria e Kosovës ka ndarë 500 mijë euro për familjet e ndikuara nga tërmeti në Turqi, që ka ndodhur muaj më parë.
Në mbledhjen e sotme, ekzekutivi miratoi edhe Projektligjin për shërbime sociale dhe familjare, ku u tha se shërbimet ndaj këtyre kategorive do të ndahen në parësore, dytësore dhe tretësore, shkruan KP.
Krahas kësaj, qeveria miratoi Projektligjin për falimentim dhe themeloi Këshillin për zhvillim të industrisë.
Po ashtu, i dhanë dritë të gjelbër vendimit për shpronësim të disa pronave në Prizren dhe Shtërpcë.
Po ashtu, gjatë mbledhjes, Qeveria miratoi edhe tri nisma për lidhje të marrëveshjeve me Suedinë.
Ekzekutivi i dha dritë të gjelbër Ministrisë së Drejtësisë që të nisë diskutimet për marrëveshjen për ekstradim me Suedinë, për transferim të personave të dënuar në mes të dy vendeve dhe për ndihmë të ndërsjellë juridike për çështjet penale.