Presidentja e Kosovës, Vjosa Osmani, kishte njoftuar se është marrë vendim për shtyrje të zgjedhjeve në veri, deri më 23 prill.
Në lidhje me këtë vendim, Komisioni Qendror i Zgjedhjeve (KQZ), ka vendosur për pezullimin e të gjitha aktiviteteve të planifikuara që kishin të bëjnë me zgjedhjet e këtij muaji.
Këtë për RTV Dukagjinin e ka bërë të ditur zëdhënësi i KQZ-së, Valmir Elezi.
“Mund t’ua konfirmoj se pas vendimit të Presidentes së Republikës për shtyrjen e zgjedhjeve dhe caktimin e datës së re për mbajtjen e tyre, Komisioni Qendror i Zgjedhjeve ka marrë vendim për pezullimin e të gjitha aktiviteteve të planifikuara më herët për përgatitjen e zgjedhjeve të datës 18 dhe 25 dhjetor”, ka thënë ai.
Po ashtu, sipas tij, KQZ-ja është dakorduar për hartimin e një plani të ri operacional për organizimin e zgjedhjeve të cilat janë caktuar të mbahen më 23 prill 2023.