Memli Krasniqi, kryetar i Partisë Demokratike të Kosovës (PDK), ka shprehur mbështetje të plotë për kandidaturën e Ferit Idrizit për kryetar të Vushtrrisë, duke e cilësuar qeverisjen e tij si shembull të stabilitetit dhe zhvillimit.
Në një postim në Facebook pas takimit në Lumadh, Krasniqi u shpreh se puna e Idrizit duhet të vazhdojë, pasi gjatë këtyre katër viteve ai ka dëshmuar se qeverisja nuk është vetëm përditshmëri, por vizion, dashuri dhe përkushtim për komunën.
“Feriti ka udhëhequr me ndershmëri, transparencë dhe pa dallime, duke e bërë Vushtrrinë shembull të stabilitetit dhe zhvillimit. Sot qytetarët e Vushtrrisë e dinë se kanë pasur një kryetar që ka punuar për të gjithë, me duar të pastra dhe zemër të hapur”, shkroi Krasniqi.
Ai theksoi se më 12 tetor, Idrizi do të marrë përsëri besimin e qytetarëve për një Vushtrri edhe më të mirë, më të jetueshme dhe më dinjitoze për të gjithë.
“Feriti, përveç se kandidat i PDK-së, është edhe kandidati dhe kryetari i të gjithë qytetarëve të Vushtrrisë”, ka përfunduar Krasniqi.