Kreu i Partisë Demokratike të Kosovës(PDK), Memli Krasniqi ka njoftuar se vizitën zyrtare në Uashington e ka përfunduar “me një takim shumë të mirë në selinë e Këshillit Atlantik”.
“Si një ndër organizatat amerikane më me ndikim në fushën e çështjeve ndërkombëtare, Këshilli Atlantik është i përkushtuar në formësimin e një të ardhmeje më prosperuese dhe më të sigurt globale”, ka shkruar Krasniqi.
Tutje kreu i PDK-së ka shtuar se “në këtë kontekst, me Drejtorin e Qendrës Evropiane, Jörn Fleck, dhe zyrtarë të tjerë të Këshillit Atlantik, kishim një diskutim të hapur dhe përmbajtësor lidhur me sfidat politike, ekonomike dhe ato të sigurisë, nëpër të cilat po kalon vendi dhe rajoni ynë”.
“Edhe këtu, unë shpreha qëndrimin dhe synimin e paalternativë të popullit të Kosovës për anëtarësimin e vendit tonë në Bashkimin Evropian, NATO dhe OKB”, ka shtuar tutje Krasniqi.
Mes tjerash, kryetari i PDK-së ka potencuar se nëpërmjet bashkëpunimit dhe ideve të përbashkëta, do të angazhohen “për hartimin e strategjive të mirëfillta politike”.