Kryeministri i Kosovës, Albin Kurti, të mërkurën e tetë shkurtit i ka ftuar ministrat në një mbledhje të Qeverisë.
Mbledhja është caktuar të mbahet të orën 10:00, njoftoi Zyra e Kryeministrit.
Qeveria të hënën e mbajti mbledhjen e fundit, në formë elektronike, ku mori vendim për dërgimin e një kontigjenti të FSK-së për ndihmë humanitare në rajonet e prekura nga tërmeti në Turqi.
Ndërsa, presidentja e Kosovës, Vjosa Osmani, e ka shpallur të mërkurën e 8 shkurtit ditë zie në Kosovë, në shenjë kujtimi dhe nderimi ndaj viktimave dhe të lënduarve nga tërmetet që ndodhën në Turqi.
“Teksa kujtojmë viktimat, nderojmë trimërinë dhe qëndresën e atyre që po bëjnë të pamundurën për shpëtimin e çdo jete nën rrënoja”, kishte shkruar Osmani në llogarinë e saj në Facebook.
Osmani një vendim të tillë e ka marrë në shenjë respekti shtetëror e qytetar dhe në përputhje me kompetencat kushtetuese e ligjore.
“Përballë tragjedive të tilla duhet të qëndrojmë pranë atyre që kanë nevojë për mbështetje. Dhimbja e popullit turk dhe atij të Sirisë është edhe e jona. Prandaj, bazuar në kompetencat kushtetuese e ligjore, në shenjë respekti shtetëror e qytetar, ditën e mërkurë, 8 shkurt 2023 e kam shpallur Ditë Zie Shtetërore në Republikën e Kosovës, pas tërmeteve të datës 6 shkurt 2023 me epiqendër në Turqi, i cili la mijëra të vdekur e të lënduar”.
Po ashtu, ka theksuar se ushtarakët e Kosovës janë në Turqi dhe të gatshëm për të mbështetur dhe ndihmuar qytetarët.