Kryeministri në detyrë, Albin Kurti, ka uruar mirëseardhjen e bashkatdhetarëve që po kthehen në Kosovë gjatë verës, duke theksuar rëndësinë që ka diaspora për vendin.
Ai ka thënë se diaspora është gjithnjë e më e pranishme në Kosovë, jo vetëm për vizita, por edhe si partnere në zhvillim dhe ndërtim të së ardhmes së përbashkët.
“Ne kemi gjithmonë nevojë për bashkatdhetarët tanë, mërgatën tonë, si mysafirë që na vizitojnë për t’u çmallur, e si partnerë të zhvillimit dhe bashkëkrijues të së ardhmes tonë. Nuk flasim më për “trurin që ikën”, por për zemrën që nuk harron: sepse ata që kanë ndërtuar jetë jashtë vendit, ruajnë mallin, mbajnë lidhjet dhe bartin përgjegjësinë ndaj atdheut tonë të përbashkët”, ka shkruar Kurti në Facebook,
“Secili mund të jetë përkohësisht jashtë atdheut, por gjithsecili është përjetësisht brenda kombit”, thekson tutje Kurti, duke shtuar se Kosova është me fat që ka një mërgatë të tillë.