Kryeministri i Kosovës, Albin Kurti, gjatë ditës së sotme ka pritur në takim ambasadorët e Holandës, Suedisë, Belgjikës, Finlandës dhe Luksemburgut.
Në njoftim thuhet se temë qendrore e këtij takimi ishte procesi i anëtarësimit të Kosovës në Këshillin e Evropës.
“Kryeministri i falënderoi për takimin miqësor mes tyre dhe theksoi rëndësinë e bashkëpunimit dhe përpjekjeve të përbashkëta në avancimin e aspiratave të Kosovës për anëtarësim në Këshillin e Evropës”, thuhet në njoftim.
Kurti ka folur për veprimet që ka ndërmarrë qeveria në tri vitet e fundit të cilat sipas tij, kanë sjellë fryte pozitive e rezultate në përmirësim të sundimit të ligjit, avancim të demokracisë dhe progres socio-ekonomik, progres ky që njihet e faktohet edhe nga raportet e ndryshme ndërkombëtare.
Referuar njoftimit, ky takim ka ofruar mundësi që Kurti t’i falënderojë ambasadorët për rolin dhe kontributin e shteteve të tyre në procesin e çlirimit, pavarësimit dhe zhvillimit të Kosovës si dhe procesin e integrimeve në organizata ndërkombëtare.
Në takim, u bisedua edhe rreth procesit të integrimit në Bashkimin Evropian dhe dialogut në Bruksel.