Avokati Arbër Jashari, në emisionin “FIVE’ në RTV Dukagjini, ka diskutuar për lirimin me dorëzani të Dejan Pantiqit, i cili ka thënë se dorëzania është njëra prej masave për sigurinë e të pandehurit në procedure penale.
“Është një prej masave alternative krahas paraburgimit, arrestit shtëpiak, thirrjes, urdhërarrestit, premtimit që s’do t’i afrohet vendit apo personit të caktuar edhe paraqitjes në stacionin policorë. Si masë është shumë e vjetër në legjislacionin tonë”, ka thënë avokati Jashari.
Jashari ka thënë se gjatë kohës së fundit kjo masë po praktikohet shpesh dhe në raste kur të pandehurit janë të komunitetit serb.
Spas bindjes së lirë të avokatit Arbër Jashari, dorëzania po shndrrohet nga një masë e të pandehurit në procedurë në një dënim.
Dejan Pantiq, i cili dyshohet për sulme terroriste në zyrat e Komisionit Qendror të Zgjedhjeve (KQZ), është liruar nga arresti shtëpiak.
Lajmin për Portalin Dukagjini e ka konfirmuar zëdhënësja e Gjykatës së Prishtinës, Mirlinda Gashi, e cila ka thënë se gjykata nuk ka pranuar kërkesë për vazhdimin e arrestit shtëpiak nga ana e PSRK-së.
Lexo dhe: Dejan Pantiq lirohet nga arresti shtëpiak
Ajo tutje bëri të ditur se Gjykata ka pranuar kërkesën për zëvendësimin e masës së arrestit shtëpiak me masën e dorëzanisë prej 30 mijë eurosh.
“Mirëpo, me datën 04.09.2023 nga mbrojtësi i të pandehurit D.P av.Ljubomir Pantovic, gjykata ka pranuar kërkesën për zëvendësimin e masës së arrestit shtëpiak me masën e dorëzanisë, ashtu që me datën 05.09.2023 gjykata nga Prokurori i Shtetit nga PSRK ka pranuar parashtresën-pëlqimin me të cilën ka propozuar që masa e arrestit shtëpiak kundër të pandehurit D.P të zëvendësohet me masën e dorëzanisë sipas nenit 177 paragrafi 1 nën paragrafi 1.1 dhe 1.2 të KPP-së, pas deponimit të shumës prej 30.000.00 Euro”, ka thënë Gashi.