Ministria e Arsimit, Shkencës, Teknologjisë dhe Inovacionit (MAShTI) përmes një njoftimi ka thënë se janë të informuar për presione politike në shkollat publike për mësimdhënësit të cilët nuk duan të jenë pjesë e grevës.
Në postimin e tyre, thuhet se ministria është duke e respektuar grevën e mësimdhënësve dhe presin që të respektohet edhe e drejta e mësimdhënësve të cilët nuk dëshirojnë të jenë pjesë e grevës.
“Duke respektuar të drejtën e atyre që janë në grevë presim që të respektohet edhe e drejta e mësimdhënësve të cilët nuk janë në grevë dhe duan të punojnë”, thuhet në postimin e ministrisë.
Në komunikatën e Ministrisë së Arsimit, thuhet se janë informuar që shumica e shkollave të Kosovës, me një shtator nuk e kanë mbajtur mësimin.
Por, sipas të dhënave të tyre, “situata dallon nga shkolla në shkollë, ku në disa ka nisur procesi mësimor e në disa të tjera mësimi është mbajtur pjesërisht”.
Në fund, kjo ministri ka bërë thirrje që mësimdhënësit të kthehen në vendet e tyre të punës duke thënë se “humbja e mësimit është cenim i të drejtës themelore të fëmijëve për arsimim”.