Ministri në detyrë njëherit deputeti Hekuran Murati, ka akuzuar opozitën se po bllokon formimin e institucioneve me qëllim që të rikthehet një model qeverisjeje të ngjashëm me atë të vitit 2019.
“Tashmë çdo gjë është e qartë – u vërtetua sot se në Kosovë ekzistojnë dy blloqe. Ata janë të interesuar ta bllokojnë vendin. Më 8 prill kishin thënë se do të votojnë dhe nuk do ta pengojnë seancën, por sot, pavarësisht ndryshimit të kandidatit, qëndrimi mbeti i njëjtë”, deklaroi Murati.
Ai tha se kjo tregon qartë se po përdoren taktika bllokuese, me synimin për ta kthyer vendin në një qeverisje ku bënte pjesë edhe Lista Serbe.
“Sot e patë se, edhe pse u ndryshua kandidati, situata mbeti identike, pavarësisht se kush propozohet. Kjo është dëshmia se kemi të bëjmë me bllokadë. Qëllimi i tyre është rikthimi i qeverisjes së vitit 2019, kur pjesë e saj ishte edhe Lista Serbe”, theksoi Murati.