Të premten e pesë gushtit, Presidentja e Kosovës, Vjosa Osmani ia ka dorëzuar familjes së gazetarit Sulejman Gashi, Medaljen Presidenciale të Meritave, me të cilën ajo e ka dekoruar gazetarin e ndjerë, Sulejman Gashi.
Në ceremoninë e organizuar në prani të familjarëve dhe të miqve, Presidentja Osmani theksoi se medalja e ndarë për gazetarin tashmë të ndjerë, Sulejman Gashi, është shprehje e mirënjohjes shtetërore për kontributin e çmuar të cilin Gashi, si gazetar e aktivist shumëvjeçar e ka dhënë për dhjetëvjetësha të tërë për shpërndarjen gjithandej të së vërtetës së Kosovës.
Presidentja Osmani theksoi poashtu se Gashi ka qenë burim i së vërtetës për Kosovën në Shtetet e Bashkuara të Amerikës(ShBA) dhe një afirmues i së drejtës së saj për liri.
“Ai ishte zëri i Kosovës. Ne sot po e institucionalizojmë kujtesën për të duke e dekoruar me Medaljen Presidenciale të Meritave për kontributin shumëvjeçar në pasqyrimin e së vërtetës së Kosovës e për të në arenën ndërkombëtare”, ka theksuar Presidentja Osmani.
Familjarët e Gashit, por edhe bashkëpunëtorët e tij të pranishëm në ceremoni shprehën mirënjohje ndaj Presidentes Osmani për kujdesin që po tregon ndaj personaliteteve të cilat kanë kontribuuar për lirinë dhe pavarësinë e vendit, dhe e falënderuan atë për dekoratën të cilën e ka ndarë për kontributin shumëvjeçar të Gashit si gazetar.