Pavijoni i Kosovës është nderuar me çmimin e tretë nga juria profesionale në Bienalen Ndërkombëtare të Durrësit.
Lajmin e ka bërë të ditur artistja dhe deputetja Eliza Hoxha përmes një postimi në rrjetet sociale, ku ka shprehur kënaqësinë për vlerësimin dhe për mundësinë që, përmes këtij projekti, të prezantohet historia e sistemit paralel të edukimit në Kosovë.
Hoxha ka falënderuar drejtorin e Bienales, Oltsen Gripshi, për mundësinë, ndërsa ka thënë se rrëfimi për sistemin paralel të edukimit është prezantuar përmes kartografisë urbane, hulumtimit dhe artit.
Sipas saj, tema e Bienales, “Periferia, tranzicione pamore”, ka krijuar mundësinë që të trajtohet periferia e Prishtinës së viteve ’90, e cila në atë periudhë ishte shndërruar në një hapësirë të rëndësishme për mbijetesën shoqërore.
“E lumtur që më është dhënë një mundësi e tillë nga drejtori i Bienales Oltsen Gripshi dhe që rrëfimin e sistemit paralel të edukimit me pas mundësi me nda me botën përmes kartografisë urbane, hulumtimit dhe artit”, ka shkruar Hoxha.