Policia e Kosovës, përmes Drejtorisë për Hetimin e Krimit të Organizuar dhe Krimeve të Rënda, në koordinim me Prokurorinë Themelore në Pejë dhe me mbështetjen e njësive tjera policore, ka zhvilluar më 13 gusht një aksion në Klinë dhe Prishtinë.
Gjatë operacionit janë kontrolluar tri lokacione në Klinë dhe një në Prishtinë, ku janë shoqëruar në polici tre persona të dyshuar për veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.
Nga ky aksion janë sekuestruar:
Një armë e gjatë snajper
Dy karikatorë me 40 fishekë
Katër pistoleta me karikatorë dhe mbi 70 fishekë
Një pistoletë me gaz me 14 fishekë
Një pushkë ajrore dhe një pushkë gjuetie
Një automatik AK-47 me dy karikatorë
Tre telefona mobilë, një thikë, një shpatë e arteve marciale dhe një antiplumb
Policia ka bërë të ditur se disa prej armëve janë me leje, por janë sekuestruar për verifikim dhe procedura të mëtejshme.
Me vendim të prokurorit kompetent, njëri nga të dyshuarit është ndaluar për 48 orë, ndërsa dy të tjerët janë liruar në procedurë të rregullt.