Është aprovuar ndarja e 40 milionë eurove për obligimet ndaj Rrjetit Evropian të Operatorëve të Sistemit të Transmisionit për Energjinë Elektrike (ENTSO), gjatë mbledhjes së Qeverisë së Kosovës.
Ministri i Financave, Hekuran Murati, ka thënë se kërkesa e Ministrisë së Ekonomisë ka qenë për ndarje të mjeteve për mbështetje.
Në këtë mbledhje është miratuar kërkesa e ministres së Ekonomisë, Artane Rizvanolli, për shkarkimin e tre anëtarëve të Bordit të ndërmarrjes publike “Infrakos”.
Afrim Mehmetaj, Selatin Retkoceri dhe Ilir Zhita janë tre emrat e propozuar për shkarkim.
“Ndërmarrja ka ngecur në realizimin e objektivave afarise megjithëse për këtë ngecje nuk ka shkaqe objektive që do të merreshin parasysh, Qeveria vlereson se anëtarët e bordit kanë bërë shkelje të detyrave fiduciare”, ka thënë ministrja Rizvanolli.
Ajo ka propozuar që të emërohet një Bord i përkohshëm që përbëhet nga Dukagjin Kastrati kryesues, Besarta Zuka, Shpend Gjugja dhe Genc Hondozi anëtarë.
Ndërkaq, pos kësaj, qeveria ka emëruar edhe anëtarët në bordet e katër ndërmarrjeve publike.
Gjatë kësaj mbledhje, qeveria ka miratuar vendimin për emërimin e Bordit të Drejtorëve në Ndërmarrjen Publike Qendrore “Trainkos”.
Kryesues i bordit është emëruar Nol Dedaj, kurse anëtarë të bordit të drejtorëve të ndërmarrjes publike të hekurudhave janë emëruar, Astrit Mehaj, Drita Kadriu-Berisha, Blerina Shamolli, Rizah Spanca dhe Shaban Neziri.
Ndryshe, qeveria ka votuar edhe për Bordin e Kompanisë së ujësjellësit Hidroregjioni Jugor.
Në këtë mbledhje u miratua vendimi për emërimin edhe të Bordit të kompanisë Ujitjes Radoniqi-Dukagjini.
Qeveria gjithashtu ka marrë vendim për emërimin e drejtorëve të kompanisë rajonale ujësjellësi “Bifurkacioni”.
Për kryesues të Bordit u propozua Naim Rexhaj kryesues, Kujtesa Ahmeti për anëtare, edhe Kujtesa Ramadani për anëtare.