Në mbledhjen e Qeverisë, e cila përkon edhe me dyvjetorin e mandatit, u miratuan gjashtë vendime të sponsorizuara nga Ministria e Financave, Punës dhe Transfereve.
Ministri i këtij dikasteri, Hekuran Murati, përmes një postimi në Facebook, ka njoftuar se këtë të mërkurë janë ndarë edhe gjashtë milionë euro për subvencionimin e kursimit të energjisë elektrike.
“Ndamë edhe 6 milionë euro tjera për subvencionimin e kursimit të energjisë elektrike, për të mbështetur amvisëritë që kursejnë”, shkroi ai.
Ai theksoi se është aprovuar Projektligji për Ratifikim e Marrëveshjes së Kredisë me KOSTT dhe KfW për projektin “Zhvillimi i Sektorit të Energjisë, faza VII”.
“Me këtë marrëveshje, Qeveria do të huazojë 25.5 milionë euro nga KfW , të cilat nënhuazohen tek KOSTT për përmirësimin e sistemit të transmisionit në Kosovë”.
Pos kësaj, është aprovuar edhe Projektligji për Ratifikimin e Marrëveshjes së Kredisë për Projektin e Ngrohtores Solare në Prishtinë me BERZh në vlerë prej 23.2 milionë eurosh.
“Ky projekt parasheh ndërtimin e impiantit solar me kapacitet 30 MW, për të siguruar zgjerimin e rrjetit të ngrohjes qendrore në Prishtinë për deri në 50 MW. Pjesa tjetër është financim nga grantet nga Qeveria Gjermane dhe BE”, shtoi ai.
Po ashtu, është aprovuar edhe ndarja e mjeteve në vlerë prej 305 mijë eurosh për mbështetjen financiare për gazetarët ukrainas e afganë të strehuar në Kosovë .
U aprovua edhe raporti i vlerësimit të përshtatshmërisë së sistemit të financimit të komunave në Kosovë për vitin 2022.
“Ky raport paraqet rezultatet e vlerësimit dhe sfidat kryesore të identifikuara nga Komisioni i Granteve, si dhe ofron rekomandime për përmirësime të mëtutjeshme në sistemin e tanishëm të financimit komunal”, tha Murati.
Në anën tjetër, është aprovuar raporti vjetor financiar për vitin 2022.
Sipas Muratit, ky raport prezanton ekzekutimin e buxhetit nga institucionet e Republikës së Kosovës për periudhën 1 janar – 31 dhjetor 2022, sipas ndarjeve vjetore të Ligjit të Buxhetit.