Tre persona kanë marrë lëndime si pasojë e përfshirjes në një rrahje në rrugën “Alpet Shqiptare”, te “Rruga C” në Prishtinë.
Këtë e ka bërë të ditur për RTV Dukagjini, zëdhënësi i Policisë për rajonin e Prishtinës, Agron Borovci.
Pas rastit, tre personat kanë kërkuar trajtim mjekësor në QKUK.
Aktualisht, Borovci ka thënë se po ndërmerren të gjitha veprimet e nevojshme me qëllim të zbardhjes së plotë të të gjitha rrethanave në lidhje me këtë rast.
“Rreth orës 10:15 është pranuar informata për një rrahje në mes të disa personave, të ndodhur në rrugën ‘Alpet Shqiptare’ në Prishtinë. Policia menjëherë ka dalë në vendin e ngjarjes dhe nga informacionet e para bëhet e ditur se tre persona të lënduar kanë kërkuar trajtim mjekësor në QKUK. Aktualisht, po ndërmerren të gjitha veprimet e nevojshme operativo-policore me qëllim të zbardhjes së plotë të të gjitha rrethanave që karakterizojnë ngjarjen”, ka thënë Borovci.
Portali Dukagjini ka tentuar të kontaktojë edhe me QKUK-në në lidhje me këtë rast, por deri në publikimin e këtij artikulli nuk ka marrë përgjigje.