Banorët serbë të Kosovës janë parë në mëngjesin e së dielës duke u nisur nga Mitrovica e Veriut për në Serbi, për të votuar për zgjedhjet që organizohen atje, këtë të diel.
Kështu raporton ekipi i RTV Dukagjinit, i cili po qëndron në stacionin e autobusëve në Mitrovicë të Veriut.
Raportohet se në pikat kufitare mes Kosovës dhe Serbisë – Merdare, Jarinje dhe Bërnjak – janë krijuar kolona të gjata.
Serbët do ta bëjnë këtë rrugë për ta shfrytëzuar të drejtën e tyre, pasi procesi zgjedhor nuk do të zhvillohet në Kosovë, në krahasim me vite më parë.
Ata do të votojnë në katër qytete në jug të Serbisë – në Vranjë, Kurshumli, Rashkë dhe Tutin.
Zëvendëskryeministri i Kosovës, Besnik Bislimi, u ka bërë thirrje shqiptarëve në Luginën e Preshevës të votojnë në zgjedhjet parlamentare në Serbi, duke thënë se “projekti serb për heshtjen e zërit shqip duhet të përballet me rezistencë e mosnënshtrim”.
Shqiptarët e Luginës garojnë këtë herë me dy lista.
Në përbërjen e kaluar parlamentare, Shaip Kamberi ka qenë përfaqësuesi i vetëm i komunitetit shqiptar.