Ministrja e Arsimit, Arbërie Nagavci, ka thënë se ndryshimet e shpeshta para kohës së saj si ministre kanë lënë gjurmë në sistemin e arsimit.
E ftuar në “Radar” me Edita Doli në Radio Dukagjini, Nagavci ka treguar se si e gjeti sektorin e arsimit kur nisi punën si ministre e këtij dikasteri.
“E kam menduar se është një përparësi, sepse nuk ka qenë diçka që ka qenë shumë e pritshme kur unë kam filluar punën si ministre, paraprakisht kemi pasur periudhën kur ka pasur ndryshime të shumta të qeverive. Domethënë ishin katër qeveri paraprakisht që nuk ishin përfunduar as gjysmën e mandatit. Pra, ndryshimet e shpeshta natyrisht se kanë reflektuar aty. Pas asaj, ne filluam menjëherë në periudhën pas pandemisë, ku kishte ndërprerje të mësimit, kishte nevojë për riorganizim dhe rikthim…ligje të filluara”, ka thënë ajo.
Tutje, Nagavci ka theksuar se sektori i arsimit dhe Ministria kishte nevojë për stabilizim.