Sindikata e Punëtorëve të RTK-së (SPERTK), ka kërkuar ndërhyrje të menjëhershme nga të gjitha institucionet përgjegjëse, për të shmangur krizën financiare që po rrezikon funksionimin e transmetuesit publik dhe sigurinë e qindra vendeve të punës.
Sindikata paralajmëron se nëse deri më 5 gusht 2025 nuk alokohet pjesa e mbetur e buxhetit të miratuar nga Kuvendi i Kosovës, do të ndërmerren hapa ligjorë, përfshirë padinë për shkelje të ligjit dhe nisjen e protestave dhe grevave nga data 6 gusht.
“SPERTK u bën thirrje të gjitha partive politike, pa dallim, që të ndërhyjnë menjëherë dhe të gjejnë zgjidhje urgjente për të mos lejuar që RTK të dëmtohet financiarisht dhe të rrezikohet puna e qindra punëtorëve. Kujtojmë se edhe në vitin 2021, megjithëse nuk kishte institucione funksionale në të gjitha nivelet, u gjetën metoda ligjore për alokimin e mjeteve dhe shmangien e krizës financiare. Në rast se deri më datën 5 gusht 2025 nuk alokohet buxheti në llogarinë e RTK-së, Sindikata do të iniciojë padi për shkelje të ligjit dhe nga data 6 gusht 2025 do të fillojë me protesta dhe greva të lejuara me ligj, deri në realizimin e kërkesave të drejta të punëtorëve dhe garantimin e stabilitetit financiar të transmetuesit publik”, thuhet në njoftim.
Sindikata kujton se në nëntor 2024, përmes Avokatit të Popullit, ka dorëzuar një ankesë në Gjykatën Kushtetuese lidhur me zvogëlimin e buxhetit të RTK-së për 2 milionë euro, por deri më tani nuk ka marrë ndonjë përgjigje zyrtare.