Deputeti i Kuvendit të Kosovës nga komuniteti goran, Adem Hoxha, së bashku me gruan dhe vajzën e tij të mitur, është sulmuar fizikisht një ditë më parë.
Këtë e ka konfirmuar për televizionin Dukagjini edhe djali i deputetit Hoxha, i cili ka dhënë detaje për rastin.
“Ishin duke u kthyer prej një feste gorane që e kemi pasur gjatë ditëve të diasporës. Ka qenë kolonë e veturave. Ky personi ka qenë në këmbë duke ecur, duke i fyer edhe sharë prapa. U afrua te dera e nënës, duke sharë. Nëna doli prej veturës dhe i tha: ‘Largohu prej familjes time’, edhe ai e ka shtyrë, këmbën ia ka lënduar. Ia nisi me bërtit, u shty me deputetin Hodža. Motra aty ia nisi me qajtë, u traumatizua edhe kështu”, ka thënë Danis Hoxha, Djali i deputetit Adem Hoxha.
I njëjti thotë që sulmi ndodhi për motive politike, ani pse thotë se nuk i di inatet me babain e tij deputetin.
“Motivet janë politike. Ai na kërcënonte në 5 vitet e fundit përmes rrjeteve sociale, Facebook-ut dhe rrjeteve të tjera sociale. E kemi lajmëruar në polici disa herë, por nuk ka pasur ndonjë masë. Ky person jeton në Zvicër, por është i Gorës”, ka thënë Danis Hoxha, Djali i deputetit Adem Hoxha.
Zëdhënësi i policisë rajonale për Prizren, Shaqir Bytyqi, ka konfirmuar rastin dhe ka bërë të ditur se është arrestuar një person.
“Rastit i janë përgjigjur menjëherë patrullat e stacionit policor të Dragashit dhe njësiti i hetimeve, edhe në bashkëpunim me hetuesit e rastit. Sipas informatave që kemi ne, viktimat janë qytetari A.H. bashkë me bashkëshorten dhe vajzën e mitur”, ka thënë Shaqir Bytyqi, Zëdhënës i policisë rajonale për Prizren.
Me vendim të prokurorit të shtetit, i dyshuari është ndaluar për 48 orë.