Gjykata Supreme e Kosovës e ka shpallur të paligjshme Rregulloren për ndryshimin dhe plotësimin e Rregullores për themelimin dhe funksionalizimin e Koordinatorit Kombëtar për Luftimin e Krimit Ekonomik, duke e shfuqizuar atë.
Ky vendim i Supremes është marrë pas padisë së ushtruar nga Shqipdon Fazliu, i cili ishte kryesues i Koordinatorit Kombëtar për Luftimin e Krimit Ekonomik, ndaj Këshillit Prokurorial të Kosovës (KPK) – institucion që e kishte miratuar rregulloren.
Në aktgjykim thuhet se vendimi hyn në fuqi menjëherë pas komunikimit të përmbajtjes dhe arsyetimit te palët, ndërsa KPK obligohet që vendimin e Gjykatës ta publikojë në të njëjtën mënyrë sikurse kishte bërë me rregulloren që tani është shpallur e pavlefshme.
“Ky aktgjykim merr formën e prerë menjëherë pas komunikimit të përmbajtjes dhe arsyetimit të tij palëve, dhe detyrohet i padituri Këshilli Prokurorial i Kosovës (KPK), me seli në Prishtinë, që të njëjtin ta publikojë në mënyrë të njëjtë sikurse të miratimit të saj”, thuhet në vendimin e Supremes.
