Ministri në detyrë i Punëve të Brendshme, Xhelal Sveçla, ka urdhëruar Inspektoratin Policor të Kosovës që të hetojë çdo lëshim apo përfshirje të mundshme të anëtarëve të Policisë së Kosovës në aktivitetet kriminale të Mefail Shkodrës, i cili është shpallur në kërkim për vrasjen e trefishtë në Gjilan.
Sveçla njoftoi këtë të hënën përmes një postimi në Facebook, ku theksoi se në çdo deklaratë publike dhe takim me mekanizmat që ai drejton, ka kërkuar angazhimin maksimal për të garantuar integritetin personal dhe profesional të çdo punonjësi publik në vend.
“Brenda kompetencave të mia kam urdhëruar Inspektoratin Policor të Kosovës që të angazhohet në hetimin e çdo lëshimi apo përfshirjeje të mundshme të ndonjë pjesëtari të Policisë së Kosovës në veprimtarinë kriminale të Mefail Shkodrës, i shpallur në kërkim për vrasjen e trefishtë në Gjilan”, ka shkruar Sveçla.
Ministri ka shtuar gjithashtu se askush nuk është i paprekshëm apo i pandëshkueshëm, veçanërisht brenda një institucioni që ka mandat parandalimin, hetimin dhe luftimin e çdo veprimtarie ilegale.
“Askush nuk është i paprekshëm apo i pandëshkueshëm veçanërisht brenda një institucioni që ka për mandat parandalimin, hetimin dhe luftimin e çdo veprimtarie ilegale në vendin tonë. Pres që me të njëjtën vendosmëri të veprojnë edhe hallkat tjera të sistemit, veçanërisht drejtësinë, në mënyrë që qytetarët tanë të jetojnë dhe të zhvillohen në një Republikë ku sundojnë siguria, rendi dhe ligji”, ka shkruar tutje ai.