Një ngjarje e rëndë ka ndodhur të hënën mbrëma në fshatin Balaj të Ferizajt, ku një person ka mbetur i vrarë me armë zjarri.
Policia e Kosovës ka bërë të ditur se pas një mosmarrëveshjeje, një i dyshuar ka shtënë me armë në drejtim të viktimës, i cili ka ndërruar jetë në vendngjarje. Vdekja e tij është konstatuar nga ekipi mjekësor.
Në vendin e ngjarjes, njësitet policore kanë gjetur dhe konfiskuar pistoletën e përdorur në krim si dhe katër gëzhoja. Gjatë kontrollit në shtëpinë e të dyshuarit, policia ka sekuestruar gjithashtu një pushkë gjuetie me 72 fishekë kalibër 12 mm dhe një pushkë ajrore.
Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion, ndërsa i dyshuari është arrestuar dhe dërguar në mbajtje. Rasti është duke u hetuar.