Të paktën 13 persona kanë mbetur të vrarë, ndërsa 21 të tjerë u plagosën pas të shtënave nga një person i armatosur në një shkollë në qendrën e qytetit rus, Izhevsk, të rajonit Udmurtia, tha ministria e Brendshme e vendit.
Personi i armatosur ka vrarë trembëdhjetë persona, përfshirë shtatë fëmijë, përpara se në fund ta vriste edhe veten.
Motivi i të shtënave në Izhevsk, kryeqyteti i rajonit Udmurtia, rreth 960 kilometra në lindje të Moskës, ishte i paqartë.
Komiteti rus i hetimeve tha se personi i armatosur kishte veshur një bluzë të zezë me simbole naziste dhe kishte të vendosur maskë në kokë.
“Trupi i njeriut që hapi zjarr tani është gjetur nga policia. Sipas raportimeve, ai kreu vetëvrasje,” tha dega e ministrisë së Brendshme në Udmurtia.
Agjencia ruse e lajmeve TASS raportoi se studentët dhe mësuesit ishin evakuuar. Shkolla ndodhet në qendër të qytetit, afër ndërtesës së administratës së qytetit dhe ka rreth 1000 nxënës dhe 80 mësues, shtoi TASS.
Rusia ka përjetuar disa të shtëna në shkolla, vitet e fundit. Në maj të 2021, një adoleshent i armatosur vrau shtatë fëmijë dhe dy të rritur në qytetin e Kazanit. Në prill të vitit 2022, një burrë i armatosur vrau dy fëmijë dhe një mësuese në një kopsht fëmijësh në rajonin qendror të Ulyanovsk përpara se të vriste veten.