Policia e Spanjës ka gjetur trupin e 22-vjeçares, Sibora Gaganit, e cila u raportua e zhdukur që nga korriku i vitit 2014, në Torremolinos të Malagas.
Siç raporton media spanjolle TGCOM, ish- i dashuri, Marco Gaio Romeo, ka pranuar se e ka vrarë atë.
Gagani, me origjinë shqiptare dhe me kombësi italiane, ka jetuar në Romë deri në vitin 2011. Sipas burimeve hetimore të cituara nga El Paìs, trupi ishte fshehur në një arkë druri midis dy mureve të banesës që ndante me të dashurin.
Hetimet filluan më 17 maj, kur Gaio Romero u arrestua me akuzën se theri me thikë partneren e tij të fundit, 28-vjeçaren spanjolle Paula, me të cilën kishte edhe një djalë. I arrestuari tërhoqi edhe vëmendjen e hetuesve për rastin e 22-vjeçares me të cilën ishte zhvendosur në Spanjë pas takimit me të në Itali.
Policia gjeti trupin e së ndjerës të martën e 6 qershorit përmes sistemit me rreze, i cili mundësoi inspektimin e zonave në shtëpi, në këtë rast mureve.
Pranë saj është gjetur edhe një thikë e përgjakur, sipas agjencisë Efe.