Presidenti i Serbisë, Aleksandër Vuçiq, ka zhvilluar një bisedë telefonike me Sekretarin amerikan të Shtetit, Antony Blinken, i cili i ka kërkuar presidentit të Serbisë, arritjen sa më të shpejtë të një marrëveshjeje me Kosovën.
“Sekretari i Shtetit Blinken e informoi Presidentin Vuçiq për domosdoshmërinë e arritjes së shpejtë të një marrëveshjeje me Prishtinën, dhe presidenti Vuçiq prezantoi pikëpamjet e Republikës së Serbisë”, thuhet në njoftimin e Presidencës së Serbisë.
Në njoftimin, po ashtu, bëhet e ditur se Sekretari Amerikan i Shtetit dhe presidenti serb, kanë folur edhe për raportet e Serbisë me Rusinë.
“Tri temat kyçe të kësaj bisede telefonike ishin çështja e Kosovës, dëshira e administratës amerikane për të arritur një zgjidhje sa më të shpejtë, pastaj marrëdhëniet e Republikës së Serbisë me Federatën Ruse, si dhe diversifikimi i burimeve energjetike të vendit tonë”, thuhet tutje në njoftim.