Kryeministri i Kosovës, Albin Kurti, ka ftuar qytetarët e Kosovës që të ndjekin mbledhjen e 100-të të Qeverisë së Kosovës e cila është paralajmëruar që të fillojë nga ora 10:00.
“Sot mbajmë mbledhjen e 100-të të qeverisë. Do të flasim për gjetjet e ministrive në këtë periudhë qeverisëse e do të votojmë në 12 pika të rëndësishme për të cilat ju ftoj t’i ndiqni drejtpërsëdrejti, pas pak, në faqen e Qeverisë së Kosovës e në timen po ashtu”, thuhet në videon e Kurtit në Facebook.
Në mesin e pikave të rendit të ditës që ka siguruar RTV Dukagjini, do të jenë:
Shqyrtimi i kërkesës së Ministrisë së Financave për ndarjen e mjeteve financiare për pensionistët dhe familjet me asistencë sociale dhe shqyrtimi i projektligjit për plotësimin dhe ndryshimin e kodit penal dhe atë të procedurës penale.
Po ashtu, pas mbledhjes pritet që konferencë të mbajnë ministrat, Albulena Haxhiu e Liburn Aliu.
Kjo mbledhje zhvillohet në ditën kur tekstet e paketës së zgjerimit dhe raporteve individuale të progresit për vendet e Ballkanit Perëndimor priten të miratohen nga Komisioni Evropian(KE) në takimin e kolegjit të komisionerëve.
Gjatë ditës, raporti zyrtar 2022 për Kosovën do t’i dorëzohet presidentes së Kosovës, Vjosa Osmani dhe kryeministrit Albin Kurti nga ambasadori i BE-së në Kosovë, Tomas Szunyog.