Dogana e Kosovës ka njoftuar të premten e 14 tetorit, se është arrestuar një zyrtar doganor në Han të Elezit, për të cilin dyshohet se ka keqpërdorur detyrën e tij zyrtare.
Sipas njoftimit, i njëjti bashkë me katër të dyshuar janë zënë në flagrancë pas një hetimi disa mujor. Të gjithë thuhet se janë dërguar në mbajtje.
“Hetuesit e Doganës në bashkëpunim me Prokurorinë pas një hetimi disa mujor sot me 14/10/2022 në orët e hershme të mëngjesit kanë zënë ne flagrancë zyrtarin Doganor dhe katër (4) të dyshuar (të gjithë janë dërguar në mbajtje)”, thuhet në njoftimin për media.
Dyshohet se zyrtari i arrestuar në vazhdimësi ka keqpërdorur detyrën zyrtare duke futur në Kosovë mallra pa pagesën e taksat doganore.
“Ky rast është vazhdimësi e politikës së doganës “Zero tolerancë për keqpërdorim të detyrës dhe korrupsion”.
Sipas njoftimit për media, Dogana e Kosovës në bashkëpunim me autoritetet kompetente do të vazhdojë kontrolla në kuadër të realizimit të detyrave dhe përgjegjësive të saj, me qëllimin e vetëm parandalimin e veprimtarive ilegale në të gjithë territorin e Republikës së Kosovës.
Ndërkaq, Dogana e Kosovës ka ftuar qytetarët të njoftojnë secilin rast të sjelljes jo etike të zyrtarëve doganor në numrin e telefonit 080050095.