Kryeministri i Republikës së Kosovës, Albin Kurti, ka takuar bashkëdrejtuesin e Partisë Social Demokrate gjermane, Lars Klingbeil, me të cilin ka diskutuar për bashkëpunimin rajonal në kuadër të Procesit të Berlinit dhe pritshmëritë nga ky samit që do të mbahet në muajin e ardhshëm.
Në takimin e zhvilluar në kuadër të Kongresit të Partisë Evropiane Socialiste, Kurti ka biseduar edhe për rëndësinë e vëmendjes së shtuar të Gjermanisë për rajonin e Ballkanit Perëndimor, si dhe për Kosovën në veçanti.
Po ashtu, sipas njoftimit nga Zyra e Kryeministrit, ata duke komentuar zhvillimet gjeopolitike dhe sanksionet si përgjigje ndaj pushtimit të paprovokuar të Ukrainës nga Rusia, është theksuar se sa është e rëndësishme që partnerët evropianë të qëndrojnë të bashkuar gjatë muajve të ardhshëm.
Ndërsa, gjatë takimit janë vlerësuar marrëdhëniet e shkëlqyeshme bilaterale ndërmjet Republikës Federale të Gjermanisë dhe Republikës së Kosovës si dhe ato ndërpartiake në mes SPD-së dhe Lëvizjes Vetëvendosje.
Gjithashtu, Kurti dhe Klingbeil kanë diskutuar për bashkëpunimin në fushën e ekonomisë, sistemin dual të arsimit dhe mbështetjen teknike.