Deputeti i Lidhjes Demokratike të Kosovës (LDK), Avdullah Hoti, pas sulmeve ruse të së hënës në Kiev, është shprehur se e gjithë bota demokratike duhet ta ndihmojë Ukrainën, pasi siç thotë ai, ajo po e mbron rendin demokratik botëror.
“Kosova është me popullin ukrainas. Ata do ta fitojnë këtë luftë, sepse po luftojnë për pragun e shtëpisë dhe për fëmijët e tyre”, ka shkruar Hoti në Facebook.
Ndryshe, të hënën e 17 tetorit, të paktën tri shpërthime janë dëgjuar në kryeqytetin e Ukrainës, duke ndezur kështu sirenat e sulmit ajror.
Sipas kreut të zyrës së presidentit ukrainas, sulmet ishin nga të ashtuquajturat “drone kamikaze”.
Kryebashkiaku Vitalii Klitschko, bëri të ditur se ndërtesat e banimit në zonën qendrore të Shevchenkivskiy ishin dëmtuar.
Shpërthime të shumta në Kiev, Ukraina raporton sulme me dronë kamikazë