Gjykata e Apelit ka lënë në fuqi vendimin me 21 vjet burg, të dhënë nga Gjykata e Shkallës së Parë për Izet Haxhinë, raporton Euronews Albania.
Ish-truproja e ish-kryeministrit, Sali Berisha, Izet Haxhia, është shpallur fajtor si bashkëpunëtor në vrasjen e deputetit të Partisë Demokratike, Azem Hajdari.
“Deklarimin fajtor të të pandehurit Izet Haxhia per kryerjen e vepres penale të ‘Vrasje me paramendim’ e kryer në bashkëpunim, dhe në bazë të nenit 78/2 e 25 të K.P denimin e tij me 21 vjet burgim”, thuhet në vendimin e gjykatës.
Izet Haxhia ishte dënuar në mungesë me 25 vjet burg për vrasjen e ish-deputetit, Azem Hajdari.
Pas 17 vjetësh në mungesë dhe azil në Turqi, Haxhia u rikthye me vullnetin e tij në Shqipëri duke kërkuar rihapjen e dosjes, pasi ai kurrë nuk i ka pranuar akuzat e ekzekutimit të deputetit, Azem Hajdari në vitin 1998, jashtë godinës së selisë blu, më 12 shtator 1998.
Haxhia u arrestua në Turqi në vitin 2006, pasi ishte në listën e të kërkuarve të Interpol Tiranës, por më pas kërkoi strehim politik në Turqi, me argumentin se i rrezikohej jeta.
Ndërsa më 2018, Gjykata e Lartë Turke aprovoi ekstradimin e tij drejt Shqipërisë, duke nisur kështu edhe betejën me drejtësinë shqiptare për Haxhinë, i cili kërkoi edhe dëshminë e Sali Berishës dhe të ish-truprojës së Azem Hajdarit, por asnjë prej tyre nuk u mor parasysh nga gjyqtarët e çështjes.
Izet Haxhia ka qenë truproja i parë Sali Berishës, kur ai u zgjodh president në vitin 1992.