Ministri i Jashtëm i Italisë, Antonio Tajani, marrëveshjen e arritur për targat midis Kosovës dhe Serbisë e ka quajtur si hap të rëndësishëm drejt paqes.
Me anë të një postimi në Twitter, Tajani ka thënë se gjatë vizitës së tij në Prishtinë dhe Beograd, kishte biseduar me krerët e shtetit duke iu kërkuar atyre që të zbusin tensionet.
“Gjatë vizitës sime të martën në Beograd dhe Prishtinë së bashku me Gudio Crosetto, dëgjuam qëndrimet e kryeministrit të Kosovës, Albin Kurti dhe presidentit të Serbisë, Aleksandar Vuçiq. U kërkova atyre që të zbusin tensionet. Arritja e marrëveshjes dje në nivel të BE-së, është një hap i rëndësishëm drejt paqes. Urime për Josep Borrell”, ka shkuar Tajani.
#Serbia #Kosovo Ho appena sentito @avucic e @albinkurti. Martedì, durante la missione con @GuidoCrosetto a Belgrado e Pristina, avevo chiesto loro di allentare le tensioni. L'accordo raggiunto ieri a livello UE è un passo importante per la pace. Congratulazioni a @JosepBorrellF.
— Antonio Tajani (@Antonio_Tajani) November 24, 2022
Ndryshe, Kosova dhe Serbia, nën ndërmjetësim të Bashkimit Evropian – më 23 nëntor kanë arritur marrëveshje për targat ilegale serbe.
Negociatat janë zhvilluar në Bruksel mes të dërguarit të BE-së për dialogun, Mirosllav Lajçak dhe kryenegociatorëve të Kosovës dhe Serbisë, Besnik Bislimi dhe Petar Petkoviq.
Kryediplomati evropian, Josep Borell, ka thënë se Kosova do t’iu japë fund veprimeve të mëtejme të lidhura me riregjistrimin e makinave, derisa Serbia nuk do të lëshojë më targa të makinave me emra të qyteteve të Kosovës.
Takimi në Bruksel është zhvilluar vetëm dy ditë pas një takimi që ka rezultuar pa marrëveshje mes kryeministrit të Kosovës, Albin Kurti, dhe presidentit të Serbisë, Aleksandar Vuçiq, lidhur me çështjen e targave.
Me kërkesë të Shteteve të Bashkuara, Kurti e ka shtyrë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS – Republika e Kosovës.