Katër persona janë sulmuar fizikisht nga persona të panjohur në sheshin “Car Llazar”, në Mitrovicën e Veriut, të hënën e 28 nëntorit.
Policia e Kosovës ka njoftuar se nga katër të sulmuarit kosovarë, dy prej tyre kanë pranuar tretman mjekësor.
Sipas raportit 24-orësh të policisë, thuhet se rasti po vazhdon të hetohet.
“Katër viktimat meshkuj kosovarë kanë raportuar se janë sulmuar fizikisht nga persona të panjohur. Dy nga viktimat kanë pranuar tretman mjekësor. Rasti është duke u hetuar nga njësitet kompetente policore”, thuhet në njoftimin e policisë.
Ndryshe, të enjten e 17 nëntorit, një shqiptar ishte sulmuar nga serbët në veri të Mitrovicës.
Zëdhënësi i policisë për rajonin e Mitrovicës, Besim Hoti, për Portali Dukagjini, kishte thënë se kanë pranuar informacione lidhur me rastin.
“E kemi pranuar si informacion. Është sulm fizik”, kishte thënë Hoti.
Ndërkaq, portali Kossev.info, ka raportuar se në pjesën veriore të Mitrovicës, ka ndodhur një incident, në të cilin, janë lënduar dy persona të nacionalitetit shqiptar, njëri prej të cilëve gazetar.
Sipas dëshmisë së dëshmitarëve okularë, qytetarët kanë ndihmuar njërin prej të plagosurve deri në mbërritjen e ambulancës.