Gjatë ditës së hënë të 5 dhjetorit në Shkup filloi manifestimi kulturor-shkencor “Ditët e Bogdanit”, e i cili do të përfundojë të martën e 6 dhjetorit në Prishtinë me një akademi solemne kushtua figurës së Pjetër Bogdanit.
Manifestimi filloi me vënien e luleve të freskëta pranë shtatores së Pjetër Bogdanit që ndodhet përballë Parlamentit të Maqedonisë, një homazh ky që do organizohet çdo 5 dhjetor, që përkon me evokimin e 6 dhjetorit të vitit 1690, ditën kur ai i mbylli sytë përgjithmonë në Prishtinë.
Më pas manifestimi u transferua në Instituti i Trashëgimisë Shpirtërore e Kulturore të Shqiptarëve(ITHSKSH), ku edhe u mbajt tryeza shkencore, në të cilën studiues nga Shkupi, Prishtina e Tirana me kumtesat e tyre ndriçuan aspekte të njohura e të panjohura nga jeta dhe vepra e Pjetër Bogdanit. Me këtë rast, drejtori i ITHKH, prof.dr.Skender Asani, ka thënë se figura e Pjetër Bogdanit është vazhdimësia e natyrshme e epokës së lavdishme të Gjergj Kastrioti Skënderbeut dhe pararendësi i hershëm i Rilindjes sonë Kombëtare, që kulmoi me Pavarësinë e vitit 1912.
“Një pjesë të mire të jetës së tij ai e kaloi në Shkup (1677–1689) dhe në Kosovë, me çka dëshmoi në praktikë kontinuitetin historik të një trashëgimie të lashtë iliro-arbërore-shqiptare në këto troje, ku Dioqeza Shkup–Prizren ishte vula e kësaj dëshmie. Me manifestimin kulturor-shkencor “DITËT E BOGDANIT” duam të rikonfirmojmë një fakt shkencor se dialektika e zhvillimit mendor, social, e ekonomik të një populli shkon përtej përkufizimeve që i dikton politika e ditës, kurse trajtimi i figurës emblematike të Pjetër Bogdanit nga ana e institucioneve tona në Shkup dhe në Prishtinë, është shpjegimi më i natyrshëm i kësaj dialektike”, nënvizoi Asani, shkruan ITSHKSH.
Manifestimi “Ditët e Bogdanit” do të përfundojë sot (e martë) me një akademi solemne në Qendrën “BogdaniPolis” (Ipeshkvia e Kosovës) dhe siç paralajmëroi drejtori Asani ky manifestim do të jetë tradicional që do t’i dedikohet kryesisht figurës së Pjetër Bogdanit nga shumë aspekte.
Ky manifestim u organizuar nga Instituti i Trashëgimisë Shpirtërore e Kulturore të Shqiptarëve (ITSHKSH), redaksia e botimeve Drita nga Ipeshkvia e Kosovës dhe nga Instituti i Historisë “Ali Hadri” në Prishtinë.