Presidentja e Kosovës, Vjosa Osmani, ka deklaruar se në territorin e Kosovës nuk do të ketë kurrë më, policë dhe ushtarë të Serbisë.
“Ëndrra hegjemoniste e Serbisë nuk do të jetësohet kurrë”, është shprehur Osmani, në rrjetin social Facebook.
Kjo deklaratë erdhi pas “kërcënimit” nga ana e kryeministres serbe, Ana Bërnabiq, e cila ka thënë se Serbia është duke konsideruar kthimin e ushtrisë në Kosovë.
Por, sipas presidentes Osmani, kërcënimi i hapur për agresion policor e ushtarak nga ana e Serbisë, dëshmon se në atë shtet vazhdon mendësia hegjemoniste.
“Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie, pikërisht në vitin 1999”, ka shkruar Osmani.
Po ashtu, Osmani ka thënë se plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit.
Gjithashtu, ajo ka përmendur edhe sulmet ndaj gazetarëve, që sipas saj, përbëjnë cenim flagrant të të drejtës për informim të lirë.
“Autorët e këtyre krimeve, urgjentisht të sillen para drejtësisë, ndërkaq institucionet e drejtësisë duhet të veprojnë menjëherë”, ka thënë tutje ajo.