Rreth 300 mijë punëtorë të sektorit privat në Kosovë do të kenë mundësi që nga e enjtja të nisin aplikimin për masën e pakos emergjente, për ndihmën prej 100 eurosh. Disa nga ata që pritet të përfitojnë, kanë thënë për televizionin se e mirëpresin këtë ndihmë, në kohën e krizës ekonomike, por që nuk është zgjidhje afatgjate.
“S’pretendoj që të ankohem, por ky është mungesë e rregullimit të përhershëm të këtij problemi”, ka thënë qytetarja Hatixhe Ramosaj.
Ndërsa Naim Kurti ka deklaruar se ‘’Është shumë mirë, mendoj që ka bërë mirë qeveria me një ndihmë kaq të vogël”, kurse Gentian Qehaja, i pyetur nga RTV Dukagjini ka thënë se një veprim i tillë është shumë i mirë dhe se, ‘’na ndihmon”.
Aplikimi për të përfituar nga kjo masë, bëhet nga një link, që u bë publik nga ana e Ministrisë së Financave.
Por, nga Oda e Afarizmit thonë se kjo shumë për punëtorët është dashur të jetë në formë të bonove, me të cilët mund të blinin vetëm produkte vendore.
“OAK ka përshëndetur vendimin e qeverisë për ndarjen e mjeteve prej 100 eurove, për punëtorët e sektorit privat, duke marrë parasysh që ekziston një numër i madh i punëtorëve në sektorin privat, ndikimi i kësaj shume mund të jetë i madh, por kemi kërkuar që kjo vlerë të jetë në formë të bonove, në mënyrë që e njëjta vlerë të përdoret për blerjen e produkteve vendore”, ka thënë Gramoz Zekaj, Oda e Afarizmit të Kosovës.
Kjo masë nuk është shumë efektive konsideron ekonomistit Naim Huruglica.
“Kjo shumë nuk zgjidh probleme, mund të ndihmojë për një kohë. Dhënie e ndihmave të tilla, në një aspekt e rëndon edhe buxhetin sepse në një formë pasi ato 100 milionë euro janë marrë nga buxheti i Kosovës, të cilat kanë mundur të alokohen në investime kapitale, ku kish pasur efekt shumë vjeçar.
Sipas Ministrisë së Financave, aplikimi do të jetë i hapur deri më 20 maj 2022.