Në një intervistë të drejtpërdrejtë në emisionin ‘Five‘ për RTV Dukagjini-n, ministrja e jashtme e Kosovës, Donika Gërvalla ka folur në çështjen e takimit me Serbinë në Organizatën e Kombeve të Bashkuara (OKB).
Në seancën e mbajtur,ku po raportohej për sigurinë në Kosovë, ka pasur një reagim nga pala serbe rreth krimeve të luftës, në të cilën, kjo e fundit kishte quajtur ish-krerët e Ushtrisë Çlirimtare të Kosovës (UÇK), ’’kasapë të Ballkanit’’, duke tentuar që krimet e kryera nga regjimi serb i Millosheviqit t’ia mveshë UÇK-së.
Gërvalla kishte deklaruar se nuk ishte hera e parë që ballafaqohemi me kësi akuzash nga pala serbe, duke theksuar se Serbia ende nuk ka bërë hapin fillestar për distancimin nga e kaluara.
”Po unë shpatën s’mund ta nxjerr në seancën e Këshillit të Sigurimit të OKB-së, dhe të fillojë dyluftimin. Unë nuk habitem aspak nga reagimi i ministrit të jashtëm të Serbisë, Nikolla Selakoviç, sepse nuk është hera e parë që ballafaqohemi në forume të ndryshme ndërkombëtare. Fatkeqësisht, Serbia edhe pas 23 viteve të luftës, ende nuk ka bërë as hapin fillestar për distancimin nga e kaluara e saj shumë e hidhur për rajonin tonë”, tha Gërvalla.
Ndër të tjerash, ajo shtoi se kjo ishte një lloj tendence për të hedhur baltën tek të tjerët, për krimet e së kaluarës nga Serbia, në luftën e shkaktuar në Kosovë.
‘’Ajo qe një tendencë e tillë për të heroizuar krimet e së kaluarës, dhe për të hedhur baltë tek të tjerët’’, deklaroi ajo.
Ndërsa, e para e diplomacisë kosovare tha se në këtë drejtim, në të ardhmen, nuk pret progres në Serbi.
”Kjo akuzë është diçka që shoqëron në vazhdimësi, jo vetëm politikën e jashtme, por edhe politikën brenda Serbisë dhe prandaj fatkeqësisht në këtë drejtim, as nuk presim në një të ardhme të afërt progres në Serbi”, deklaroi Gërvalla.
Gjithashtu, në seancën e mbajtur në OKB, ministrja Gërvalla njoftoi se fillimisht ka pasur rastin të takohet me palët e shteteve aleate, të cilat kanë qenë përkrahëse për Kosovën, dhe kanë shprehur gatishmërinë për ti ndihmuar Kosovës në forcimin e shtetësisë së saj dhe proceseve të brendshme.