Kanceri i Peles ka përparuar, ka konfirmuar një deklaratë nga spitali i Sao Paulos ku po trajtohet legjenda 82-vjeçare braziliane.
Tri herë fituesi i Kupës së Botës ndodhet në spital prej tri javësh.
Vajza e tij ka shkruar në Instagram se Krishtlindjet do t’i kalojë në objektin e spitalit.
Një deklaratë e lëshuar nga Spitali Israelita Albert Einstein tha se Pele “kërkon më shumë kujdes në lidhje me mosfunksionimet renale dhe kardiake” për shkak të “progresionit të kancerit”.
Peles iu hoq një tumor nga zorra e trashë në shtator të vitit 2021 dhe që atëherë ka pasur trajtim të rregullt.
“Krishtlindja jonë në shtëpi është pezulluar”, ka shkruar vajza e Peles, Kely Nascimento. “Ne vendosëm me mjekët që, për arsye të ndryshme, do të ishte më mirë për ne të qëndronim këtu”.
Menjëherë pasi ai u pranua, një deklaratë e lëshuar nga spitali tha se Pele “kishte një përgjigje të mirë ndaj trajtimit për kujdesin e infeksioneve të frymëmarrjes” dhe shtoi se ai po i nënshtrohej një “rivlerësimi të trajtimit me kimioterapi”.
Pele është golashënuesi më i mirë i të gjitha kohërave të Brazilit për meshkuj me 77 gola në 92 ndeshje dhe ai e ndihmoi vendin e tij të fitojë Kupën e Botës në 1958, 1962 dhe 1970.
Lojtarët e Brazilit i bënë homazhe Pele pas fitores së tyre në 16-ën e fundit ndaj Koresë së Jugut gjatë Kupës së Botës 2022, duke mbajtur lart një pankartë me emrin dhe foton e tij.