Lëvizje të shpeshta të automjeteve të Policisë së Kosovës dhe të EULEX-it vërehen afër barrikadës të vendosur dy ditë më parë afër shkollës teknike në veri.
Ndonëse është paralajmëruar për heqjen e barrikadave mëngjesin e së enjtes, barrikada vazhdon të qëndrojë ende në këtë lokacion.
Situata e sigurisë aktualisht është e qetë.
Policët janë duke vazhduar patrullimet nëpër zonat e banuara me popullatë të përzier në veri të Mitrovicës, duke ofruar kështu rend dhe siguri për të gjithë qytetarët pa dallim, shkruan KP.
Barrikadat në veri, që u bënë pengesë për lirinë e lëvizjes, duket se po numërojnë orët e fundit.
Kështu të paktën ka lënë të nënkuptohet nga fjalët e presidentit serb, Aleksandër Vuçiq, që dha një afat kohor deri të premten mbrëma se kur do të mund të hiqen, raporton KP.
“Për 24 orë apo 48 orë do të hiqen barrikadat”, tha ai, pas takimit me përfaqësuesit e serbëve nga Kosova të mërkurën mbrëma në kazermën e Ushtrisë Serbe në Rashkë, afër kufirit me Kosovën.
Ndryshe, të enjten janë djegur kamionët në njërën nga barrikadat e vendosura në veri të Kosovës.
Siç raporton ekipi i gazetarëve të RTV Dukagjini që gjenden në vendin e ngjarjes, kamionët e djegur janë në barrikadën e vendosur te “Kërshi i Dudës” që pamundëson lëvizjen nga Mitrovica e Jugut në drejtim të Rudarit, Komuna e Zveçanit e vendosur nga serbët lokalë më 27 dhjetor.
Portali Dukagjini ka kontaktuar Policinë e Kosovës për më shumë detaje mirëpo ende nuk ka marrë ndonjë përgjigje.
Ndryshe, arrestimi i ish-policit serb, në të cilin Kosova dyshon se ka sulmuar anëtarët e Komisionit Qendror të Zgjedhjeve, ka qenë arsyeja e barrikadave që përfaqësuesit serbë në veri të Kosovës po mbajnë që nga 10 dhjetori.
Lirimi i tij është një nga kushtet për heqjen e bllokadave dhe më 28 dhjetor autoritetet në Kosovë ndryshuan masën e sigurisë, nga paraburgimi në arrest shtëpiak.